ACTIVITIES HIGHLIGHT CA X YJ Tasting RD 1

打風前夕,唔係唔聚會飲返晚呀嘛? 7點,齊人,開波 。   又Wine又有威,梗係輕鬆野行先 1.Chateau Mihope Chardonnay Dry White Wine 2019 一如上月所試,熟黃色水果,混雜著堅果和顯著的火石,微微的蜂蜜隱藏其中。 口感圓潤,酸度舒適。 尾韻帶火石與些微提子乾香氣。 之前既聚會,講起白酒,有人唔鍾意,原因係覺得果陣酸味係「嘔吐物般既酸」。 其實都有D唔係咁sharp,帶D熟果、honey既白酒既,就好似呢枝咁。 2.Chateau Gruaud Larose 2000 天係咪將降大任我就唔知,但行弗亂其所為就好明顯, 凡事一波幾十萬折,黑氣纏身都唔係浪得虛名。 行走江湖,斷cork呢D少不免啦,粉碎到咁樣都真係好俾面。 無Ah so ,無牙簽,無decanter .Fine , 買個篩囉。 人窮就比較著重性價比,我成日同D新手朋友講,bordeaux野,算吧啦, 我會形容佢係韓國女團,唔係唔正,個個纖腰長腿,正!不過無個噏得出名。 其實又唔係事實既全部黎既,當佢有返D年份,成長左就各顯特色,只不過,貴囉,新手入門,何必呢~ 而係眾多叫得出名既Bordeaux入面,個人認為Larose比較與眾不同,比較earthy 、wet leave 類既氣味。所以,既然忽略性價比,不如試枝更明確易認架啦。 擺係枱都聞到既香氣, 嘩,紅黑果、泥土、甘草、煙草、皮、肉、陳皮、雪松, 香氣混和得非常融洽。用我既自私杯聞香,非常集中且乾淨既雪松香, 係正中心點有一團香甜到漏汁既紅黑果氣團,不得了。 口感絲滑,酸度活潑,仍然long way to go . 配一口燒鴨,omg !果D酸度加埋陳皮味簡直有如酸梅醬既效果, 果層皮,果陣哄烤既香味,一絕 ! 有酒友都聞到D 菇、土地、青苔呀咁,個腦海中出現在D荒廢小屋,哈哈哈。 黎到「重」頭戲,落威啦 店主刻意而為,有普飲有特色,一連4款,慢慢比較感受。 威我都係小小小小小小小師弟,成晚又要食飯又要講,連飲都唔得閒, […]

Tasting Note Casal GarciaVinho Verde N.V.

花、梨、青檸香氣,混雜著些許蜜糖和焦油,還隱透點白桃。 微氣泡和酒液滑過舌面後的刺激酸度,帶來一陣酸爽感。 尾韻是青檸、柔和的焦油隱帶一丁點蜜糖。 人生第一次試綠酒,簡單,舒爽,討喜。 雖說夏天喝是很無敵,但香港的秋冬天,打甂爐配上它應該也非常合襯。 Nice one .

Tasting Note Sena 2009

集中,很熟很甜美的雜莓香, 底下是黑朱古力、石墨、葉子和煙草等如果盤般承托著。 中高的酒體,中等酸度,口感絲滑。 優雅悠長的收結,消散前一刻爆炸出一堆雜莓。 甜美,平衡,優雅,很好啊。

【迷思】酒塞上有結晶是好酒 ?

曾經在一個品酒會上聽過 , “酒塞上有結晶是好酒 “ 再睇住佢手上果杯深黃色液體加埋果陣梅菜味(明顯已經過熟), 真係嚇到水都噴出黎。   果D結晶其實係酒液入面既酒石酸同鉀結合叫酒石酸氫鉀既物質。 酒石酸係葡萄天然的酸度,未發酵前溶於葡萄汁, 發酵後,出左酒精,而酒石酸相對無咁溶係酒度, 隨時間慢慢結晶化,愈變愈大到肉眼可見,就係咁。   到底點解會演變成為係一個好酒既指標已無從考究。 但又咁講,既然係隨時間而變得肉眼可見, 咁即係話擺愈耐既酒愈大機會見到, 可能,好多人開久經陳年既酒都見到酒石酸結晶, 而開young wine又見唔到喎,久而久之就變誤傳成”酒塞有結晶係好酒”囉。   如果再聽到d sales話”酒塞上有酒晶係好酒”, 唔好同佢買酒啦, 一係無知,一係無恥,撇。     Cheers ~

Begin typing your search term above and press enter to search. Press ESC to cancel.

Back To Top