【迷思】酒塞上有結晶是好酒 ?

曾經在一個品酒會上聽過 , “酒塞上有結晶是好酒 “ 再睇住佢手上果杯深黃色液體加埋果陣梅菜味(明顯已經過熟), 真係嚇到水都噴出黎。   果D結晶其實係酒液入面既酒石酸同鉀結合叫酒石酸氫鉀既物質。 酒石酸係葡萄天然的酸度,未發酵前溶於葡萄汁, 發酵後,出左酒精,而酒石酸相對無咁溶係酒度, 隨時間慢慢結晶化,愈變愈大到肉眼可見,就係咁。   到底點解會演變成為係一個好酒既指標已無從考究。 但又咁講,既然係隨時間而變得肉眼可見, 咁即係話擺愈耐既酒愈大機會見到, 可能,好多人開久經陳年既酒都見到酒石酸結晶, 而開young wine又見唔到喎,久而久之就變誤傳成”酒塞有結晶係好酒”囉。   如果再聽到d sales話”酒塞上有酒晶係好酒”, 唔好同佢買酒啦, 一係無知,一係無恥,撇。     Cheers ~

【迷思】酒瓶底部凹槽愈凹酒愈好 ?

酒瓶底部凹槽愈凹酒愈好 ? 聽完真係當堂嚇一跳,然後得啖笑。 無法相象外在酒樽設計點樣同酒質扯上關係。 酒瓶底部凹槽 – Punt既出現應該係歷史因素。 工業革命前,玻璃酒瓶仍然係玻璃師傳手工吹製, 造成凹槽係令酒瓶可以平整直立。 (小弟唔識整玻璃,但想象一下,如果整玻璃酒瓶個底部不平整, 向外凸出,咁係真企唔穩架喎,與其為自己增加難度,整個凹槽咪包無死囉。) 咁宜家製瓶技術已經好左,點解仲要留住呢個凹槽呢? 我覺得有一個原因都係習慣左,無問題就唔會諗住改啦(笑)。 另一個原因,凹槽可以增加酒瓶結構的堅固度,尤其是承裝氣泡酒既酒瓶, 需有這個凹槽才能耐得住高壓,唔係就好容易爆裂。   另外,當葡萄酒陳放愈耐,沉澱物質就可能越多, 酒瓶底部的凹槽可以讓沉澱物自然沉積在最底部, 倒出黎飲果陣時都無咁易倒埋落杯。 呢個先可能係令人覺得凹槽越深就愈好既原因。 總之,凹槽深淺同酒質,酒價無關。 唔駛拗,因為德國Riesling既酒樽係無凹槽(笑)。 Cheers~

迷思 – 溝酒飲更易醉 ?

溝酒飲更易醉? Yes and no. 如果溝酒就易醉,咁一杯Cocktail都夠做啦, 呃女咪好易? 其實主要原因是氣泡會使消化系統加速吸收酒精,一般含酒精飲料進入消化系統後, 大約20%酒精會由胃壁吸收,其餘80%則由腸壁吸收, 但若酒精飲料含二氧化碳氣泡,氣泡會刺激胃的括約肌,助長胃排空, 加速酒精進入腸道,進而快速進入血液。 所以,令你更易醉既唔係溝酒, 而係溝氣泡。 不過又咁講,溝酒飲既另一個意思即係飲多過一款啦, 本來飲一款白,之後開多款紅,咁整體酒精既吸叫量都係大左既。 而溝威士忌黎講呢,威士忌本身就高酒精度嘛,低極都40%啦。 如同投資一樣,風險,要自己衡量。 喝酒是為了開心,微醺就好。 Cheers~

迷思 – 愈貴愈好 ? – 關於葡萄酒價的二三事

酒價愈貴愈好 ? Yes and no 影響葡萄酒價的因素有很多,先講一下極端不合情理既。 1.炒作 供需姐,有人買就有人賣,升升跌跌,巿場最終會搵到佢既平衡(笑)。 某知名酒評家給予高分又或者某神經釀酒師點名讚揚酒莊, 酒價自然鯉躍龍門,升值以倍數計。   物以罕為貴,產量愈少,炒價愈高,葡萄酒是喝一瓶沒一瓶的東西,老年份的當然愈升愈高, 當某些知名釀酒師不幸離開我們的話,酒價亦會坐火箭。 產量影響。氣候異常,必然影響農作物的收成,如產量少又或者質數不好, 只能出產極少量的酒,酒價又是會暴升。   酒是消耗品,也是藝術品,更是投資產品。 講到投資就有投機就有炒賣,就睇資金流去邊啦(掩面)。 2.Marketing 所謂行銷,所謂品牌就是一種識別標誌、一種精神象徵、一種價值理念。 它讓你感覺良好,已經脫離了物質本身,什麼源料,怎麼製造,都不相干。 難道舉世知名的Lafite 真的會比酒友稱呼作超二級莊的Pichon Baron好上三四倍 ? 又,Petrus 可以比Lafite 好上十倍 ? DRC 又比Petrus好上十倍 ? 都不會,就是物以罕為貴,就是炒作,就是Marketing。 撇除這些心理因素,我地從根本既角度研究下。 3.地域 全世界咁多產區,一個國家既經濟水平同另一個國家一定有差別, 香港買間屋仔既錢係英國可以買間house連花園。地價就已經好唔同。 而同一國家內,地價都可以天差地別,葡萄酒係講「風土」既, 每個地塊(葡萄園)都唔同,如土壤、氣候、日照、經緯道等的差別, 這些綜合起來就成了葡萄的風味物質,有些可以種出超凡的葡萄,釀出絕世佳釀。 有些就註定只能平平無奇。 人工,生活水準不一樣,人工當然有差別, 在美國請一個工人的錢,在非州可能可以請六個。 這最終亦會反映係酒價。 4.種植 品種會有影響啦,某D品種係迎合潮流既,自然賣到好價, 相反,逆潮流既就自然唔值錢。 種植密度,一公頃種萬二株定八千株,產量當然影響價格。 種植方法、如何管理葡萄園亦會影響成本最終影響價格。 5.釀製 機器採還是人手採。 篩選、控溫、過瀘等設備的價錢。 釀製的器皿、 方法、酵母菌種的價錢。 陳釀的器皿,如鋼桶還是木桶,新的還是舊的,法國的還是斯洛伐克的。 […]

迷思 – 為什麼收開瓶費很合理?

點解自帶酒水仲要俾錢 ? 你唔會拎M記去KFC食掛? 都唔會自己煮好餸拎去餐廳架. That’s why . 打開門就係做生意,一買一賣, 你需,佢供,就係咁簡單姐。 你要既,佢俾唔到,咪成交唔到囉, 容許自帶酒水就已經係一種折衷, 真係要劃出腸我就數幾個原因俾你啦: 1.打開門,做生意,你坐低食野就賺你錢架啦,好合理架喎。 2.係,枝酒係你自己帶既,D杯係餐廳架嘛,收杯係侍應收,洗杯都係餐廳洗, serve 枝酒都要技巧既,storage都要地方啦。 玻璃杯/水晶杯,拎出拎入,打爛好平常,呢D成本咪又係店家食。 3.其實設開瓶費都係一個門檻,愈高級既餐廳愈需要,飲酒既都知道”food pairing”, 配合相宜,可以升仙,配搭失敗,米芝連都變劣食。 假如五舊水食一餐飯,唔通你拎枝yellow tail去咩。 唔開返咁上下開瓶費, 大家隨手拎枝酒入去,莫講未必襯得起個食物, 高級餐廳既格調都拉低晒啦。 講咁多,唔係要寸你呀, 係想你俾錢個心都舒服D姐。 飲啦 ! cheers ~

【趣聞】為什麼是Lafite 82 ?

直到今時今日,不論你識飲唔識葡萄酒,遇到咩好事都會講「開返枝82年Lafite先。」 Lafite 82 點解咁出名? 係呢度就要拆開2樣野講,1 – Lafite ,2 – 82 Lafite(拉菲) Lafite酒莊係由一名姓Lafite既貴族係1354年創園,係十四世紀已相當有名氣。 係十七世紀,當時上流社會著名既交際花,法王路易十五的情婦龐巴迪對Lafite情有獨鍾,令Lafite流行於凡爾賽宮既貴族間。 而去到1855年,當時法王拿破崙三世欲於巴黎世博會向世人展示波爾多葡萄酒, 於是委託波爾多酒商將當地最好的酒莊挑選出來,評定分級,共分5級 ,而係多如繁星中既酒莊被挑選出黎既61間酒莊當中,有4間被列為1級,Lafite(拉菲)酒莊就是其中一間。 82 82,係1982,一個年份,一個對波爾多酒好特殊既年份。 當年波爾多7 月炎熱,8 月涼爽,9 月陽光充足,葡萄成熟度達到了完美狀態。 極好既材料加上大師名廚,成品就註定是一個傳奇。 如此這般,82年Lafite成為酒界傳奇並不稀奇,奇就奇在點解係一般「平民白姓」間成名流傳呢? 其實80年代,剛巧是香港經濟起飛的時候,當時的富人等於我地今日講既”土豪”,邊樣紅邊樣威就買邊樣, Lafite 82 成為「富貴」、「成功」既象徴。 而將Lafite 82既名氣推得人盡皆知則不得不歸功於港產片, 當時港產片地位係世界第二,僅次於荷里活,流行程度可想而之。 係「賭神」入面發哥既一句「同我開枝82年既Lafite」就將82年Lafite 既名氣係「平民」間推演開來, 亦由於呢一幕太經典,各類電影甚至後來網絡世代仍然會玩呢一個「開枝82年Lafite」既Gag, Lafite 82 流行至今就係咁勒。 故事就講到呢度口都乾, 等我都返枝82 既……………..可樂先~ (82 Lafite~哪有錢.jpg) Cheers~

【趣聞】Cheers ~ 為什麼要碰杯?

Cheers ~ 飲酒既場合都必然會聽到 然後大家都”碰碰杯” 其實點解大家要”碰杯”呢? 當然我地都有樣學樣,小時睇到大人咁做, 大左就繼續做囉。 起源係點,無從考究。 有幾個說法都幾有趣: 1.為了讓耳朵也滿足 飲酒,眼可以睇到顏色,鼻可以聞香, 舌頭可以感受味道,唯獨耳仔無法響受。 於是乎古希臘人就諗到碰杯令杯子發出清脆的聲音, 讓耳朵也能”享受”美酒。 2.為了驅除鬼怪 中世紀時,人們認為歡宴會引來妖魔鬼怪犯罪, 所以碰杯時發出聲響驅走這些”污物” (同中國放炮仗用聲音驅邪的習俗亦有相符之處喎~) 3.避免中毒 中世紀時,下毒殺人是常有的事。 所以與主人碰杯,冷酒液濺到對方杯子。 要死就一齊死啦,哈! 對於呢個說法,小弟百思不得其解, 碰杯黎交換液體,而交換既含毒素既酒液既量係足夠毒死人, 落既毒難道係傳說中既含笑半步釘? 4.增加集體歸屬感 主人嗌Cheers,其他人一齊”碰杯”, 立馬將所有你、我、他變成我地, 宴會氣氛即時提升。 呢個係唔係起源既原因就唔肯定, 但令人更投入更愉快更拉近人既距離就必然既。 好勒,故事講完又講返件正事。 宜家既葡萄酒杯,其實好薄。 當有人嗌Cheers果陣, 一齊舉杯示意就已經可以啦, 碰杯果下清脆聲好易變成爆杯聲架, 唔爆,酒液四濺都失禮啦。 真係要碰,碰杯肚,而且要輕柔地碰。 車,又話碰杯起源可能係讓耳朵響受或驅鬼? 喂,講緊舊時喎,舊時唔係用玻璃/水晶杯架嘛, 青銅杯,個杯仲大過你個湯碗呀。 唔講咁多啦,飲啦! Cheers~

【趣聞軼事】Why Bordeaux

係我踏上酒途之前就已經聽過波爾多紅酒,時至今日, 係香港隔鄰既地區既酒鋪SALES. 仍然用波爾多黎做賣點SELL客,何解? 在12世紀,波爾多所屬的阿基坦(Aquitaine)女公爵埃莉諾(Eleanor),與英格蘭國王亨利二世結婚, 阿基坦及其波爾多地區作為嫁妝,陪嫁給了英國。當女公爵變成王后,波爾多紅酒也就成為英國皇室用酒, 而英國國王為了向在這裏的法國文眾表示親善,所以免除了波爾多區出口到英國的酒關稅。 這樣不單令波爾多受惠,其他酒區也因免稅關係,轉而到波爾多出口酒到英國。 這就助長了品牌效應,除了名,波爾多作為中轉站也收取了不少貿易收益。 到15世紀,英法爆發百年戰爭,法國獲勝,波爾多又回到法國的懷抱。 我地飲酒既,成日都講一句話就係”返唔到轉頭”,飲慣左優質既波爾多, 英國人係返唔到轉頭。 至16世紀,英國打敗西班牙,開始崛起,隨後成為世界霸主。 在這一路征戰擴張中,英國人所愛的波爾多紅酒,也伴隨著英國的擴張走向全世界。 到17世紀,Medoc(梅多克)當時仍是沼澤地,一片泥濘。 在治理河道上極富經驗的荷蘭人,在波爾多入海口附近攔壩排水,令土地適合耕作, Medoc便開始種植葡萄,可誰也沒想這裏的土壤能出產如此優質的葡萄,自此 Medoc成為波爾多的主要產酒區基奠。 到18世紀,波爾多酒出口到英國既酒量愈黎愈大,你係英國人, 你又做唔出咁優質既葡萄酒,你會點丫? 無錯,黎波爾多投資酒商酒莊、買酒運回英國儲存再出售圖利。 有錢有發展,此舉令波爾多酒業有更好既發展,同時亦為波爾多酒製做出更大需求。 而著名既1855年既分級制,就更係令到波爾多酒聲名大噪。 適合的地方(氣候、土壤)、適合的葡萄品種,加上錢(技術、設備既提升),最後再加上巿場推廣。 成功方程式的完美展現~ 波爾多無疑是優秀的,但優秀的不止波爾多。 葡萄酒喝的是”風土”, 每個地方不一樣,每個品種不一樣,每個酒莊不一樣。 多嚐,會發現世界充滿驚喜,Cheers~

Begin typing your search term above and press enter to search. Press ESC to cancel.

Back To Top