【練習】感受酒體

飲酒成日聽人講酒體豐厚或者Full body, 到底酒體(Body)係指咩呢? 其實所謂酒體,係酒液中既單寧、糖、酸、甘酒、酒精等物質加埋既”份量”, 形容酒體即係形容酒夜既質量、密度、 黏稠度與飽滿度既綜合感知。 酒精度愈高,黏稠度愈高,感覺愈”重”, 單寧、糖、甘酒等浸漬物愈多,質量愈”重” , 而酸愈多,則感覺酒體愈輕。 想好好感受一下又黎兩杯酒對比下….. 咁又唔駛, 最簡單既用水同牛奶(蜜瓜奶/香蕉奶….)對比下就知, 愈似水咁輕、無乜風味、好浠既就係輕酒體(light-body), 倒轉愈重、風味濃郁、好稠既就係重(Full-body)啦 咁中間呢? Medium-body囉~ Cheers~

【練習】感受單寧

甜酸苦咸鮮,呢D大家都好清楚咁認知到係咩亦能夠清晰表達, 但講到單寧,可能就比較陌生啦,不如我地先認識一下單寧先。 單寧(Tannins),係一種酚類物質, 自然界中很多植物都有, 例如葡萄、茶葉和橡木等。 葡萄酒既單寧就係黎自葡萄皮/籽/梗或者木桶。 葡萄酒入口, 單寧會同口水中的既蛋白質產生聚合, 減低口水的既潤滑效果, 產生收斂性 ,即係我地講既”澀”。 所以感受單寧也有部份是觸覺的感受,除了苦味,口腔會感受到”嚡”既感覺, 上下唇果D”黏住黏住”既感覺就係單寧帶黎黎既感覺。 單寧愈圓熟細緻,酒液既感覺愈輕柔 ; 相反,單寧會生愈粗獷,帶黎既感覺就愈”嚡”。 講咁多都仲係覺得好似明又好似唔明咁呢~? 睇youtube學游水一世都唔會識, 用同一個方法啦,兩杯白酒, 一杯正常,一杯加茶包浸5分鐘再飲, 對比一下前後兩杯既差別就能確切明白單寧帶黎既感覺。 Cheers~

【練習】感受甜/酸度

上一篇就講左關於香氣既練習,黎到口感又相對簡單得多。 味覺都係感受甜酸苦咸鮮加上似個觸覺更多既辣同質感。 關於甜/酸度相信唔駛多講,想確切感受下, 拎兩杯白酒,其中一杯正常,另一杯加糖/加檸檬汁, 咁就可以好清楚感受到甜/酸係點樣。 需要注意既係甜度高又會減低對酸既敏感度,反之亦然。 所以有時D酒好酸,但因為甜度高,所以你唔覺酸, 但其實脷既兩則有D麻,口水不斷湧出黎,呢個就係高酸既表現啦。 今次就簡單D, 下次再講D可能大家概念有D唔清晰既單寧同酒體。 Cheers~

【練習】品酒師都有狗鼻子?

「吾~紫羅蘭、橄欖和切片李子、印度香料、卡布奇諾咖啡、朱古力、甘草和拖肥!」 當身邊既酒友急急如律令一輪再情深款款地望向你, 從佢既眼神,你感受到佢等緊你既回應,你既附和,你既認同。 你呢個同佢相差9又3/4寸既距離, 係腦入面既data base插索左5次半,仍然只能回應佢”三個字”,「真係好香呀。」 1秒鐘唔到既時間,你感覺到佢熾熱既眼神回到冰冷落寞, 距離從9又3/4寸變成地球同月球之間既差距,心入面除左慶幸佢唔你心儀對象之外, 亦多左一個疑惑,係我個鼻有問題定佢個鼻真係咁勁? 難道品酒師個個都有個狗鼻子? 非也! 黃金右腳都要Keep住操練啦,普通一個上班族唔操跑到全馬你都唔信啦。 訓練架姐。 葡萄酒釋放出的香氣分子先透過嗅覺傳達整體印象,然後, 呢一個複雜既整體印象會被大腦拆分並同腦中數據庫對比曾經接觸過的各類香氣。 呢度牽涉兩樣野︰ 1.你要有Data Base,即係你聞過D花花草草、水果樹木又或者係朱古力 or 咖啡咁啦。 Data Base都無資料又點可以對比呢? 2.聞到既氣味同腦入面既Data Base資料既比對,腦入面儲存大量資料,諸如聖誔節、情人節、女友生日、婦女節、兒童節(呢個都關事?女人係要收禮物姐,節日只係俾你既藉口。)等等等等。等你load得黎人地酒都飲完啦,想快D,對比資料少D同相關D咪得囉,例如飲紅我地抽出紅黑果既資料庫,好似紅莓、藍莓咁;白酒咪綠色白色水果囉,好似青蘋果、桃呀咁。 葡萄酒世界有個叫香氣輪盤既東東,就算唔完全有齊所有香氣,常用既都有齊架啦。 睇左佢,起碼可以拎個方向,通常葡萄酒D人會用咩形容。 (圖片來源) 係咪一定要背咁悶爆先? 唔係。 其實多加留意日常生活既事就可以, 糖果零食總有士多啤梨蘋果橙香味丫,咖啡朱古力茶葉涼茶會飲丫, 超巿賣既生果,落雨後既泥土味等等都係可以收進Database既氣味, 只要日常生活稍加留神,其實唔需要太刻意背。 說到底都只係唔同既香氣分子既組合,只要令你聯想起果樣野,其實無人可以話你錯, 品酒亦都係為個人愉悅,太過刻意公式就失去意義。 Cheers~

Begin typing your search term above and press enter to search. Press ESC to cancel.

Back To Top